Syt schlächti Vrlürer! – Der Text, den Guy Krneta für die Demo am 1. März auf dem Bundesplatz geschrieben hat, hier bei Journal B: Zum Lesen, Herunterladen und Weiterverbreiten.
Syt schlächti Vrlürer.
Findet nech nid drmit ab, dass d SVP ds Land schpautet.
Syt schlächti Vrlürerinne.
Löt nid zue, dass es «Mir», wo dir nid drzue ghöret, d Säubschtbeschtimmig über d Schwyz übernimmt.
Syt schlächti Vrlürer.
D Schwyz isch nid dr Club am Rennwäg u bruucht ke Securitiy, wo am Ygang schteit un e Konto-Uszug vrlangt.
Syt schlächti Vrlürerinne.
Ohni Ywanderer würd’s das Land gar nid gä.
Syt schlächti Vrlürer.
Es git nid Schwyzer u Angeri. Di Angere gö dür üs düre. Mir sy Migrantinnen u Migrante zu hundert, zu füfesibezg, zu füfzg, zu füfezwänzg, zu zwöufkommafüf Prozänt. Üs cha me nid kontingentiere.
Syt schlächti Vrlürerinne.
Ir Schwyz git’s meh Minderheiten aus Mehrheite.
Syt schlächti Vrlürer.
D Schwyz isch euter aus dr Chrischtoph Blocher, aber si het meh Zuekumft.
Syt schlächti Vrlürerinne.
Es git nid zwo Sorte vo Mönsche. U wär d Demokratie über d Grundrächt schteut, nimmt dr Demokratie ihres Rächt.
Syt schlächti Vrlürer.
Es git nid ei Schwyz, sondern viu Schwyze.
Syt schlächti Vrlürerinne.
Es git kes Vouk, aber e Bevöukerig.
Syt schlächti Vrlürer.
Gäg Lohndumping wehrt me sech mit Mindeschtlöhn u nid i däm me de Lüt ds Rächt nimmt, sech z wehre.
Syt schlächti Vrlürerinne.
Gäg Dichteschtress im Chopf hiuft es guets Buech.
Syt schlächti Vrlürer.
U fraget nachem Dichteschtress i de läären Outo.
Syt schlächti Vrlürerinne.
Gwöhnet nech nid a d Chriegsrhetorik vom Chrischtoph Blocher.
Syt schlächti Vrlürer.
Gwöhnet nech nid a d Chriegsrhetorik i de Medie vom Chrischtoph Blocher.
Syt schlächti Vrlürerinne.
Gwöhnet nech nid a d Schützegräben im Chopf vom Ueli Murer.
Syt schlächti Vrlürer.
U vrlanget, dass men öii berächtigti Angscht vor ungarische Zueschtäng äntlech ärnscht nimmt.
Syt schlächti Vrlürerinne.
Wehret nech gäge d Wiukür, d Säubschtjuschtiz, d Schattewirtschaft, wo d SVP im Asylberych inschtaliert het.
Syt schlächti Vrlürer.
U wehret nech drgäge, dass d SVP di ganzi Schwyz zum Asylberych wott mache.
Syt schlächti Vrlürerinne.
Wehret nech gäge d Schprachumchehrige. D Gseuschaft het sech nid am Woou vor Wirtschaft z orientiere, sondern umgekehrt.
Syt schlächti Vrlürer.
D Freiheit faht nid dert aa, wo mr frei sy vo auem, auso o Freiheit.
Syt schlächti Vrlürerinne.
Dischtanzieret nech vo den internazionale Nazionalischte, wo itz gratuliere.
Syt schlächti Vrlürer.
Demokratie isch ke Schlacht, wo’s Sieger git u Vrlürer, wi Marignano. Demokratie isch e Form vo Usenandersetzig, wo nid fertig isch nach deren Abschtimmig. Im Gägeteil.
Syt schlächti Vrlürerinne.
We d SVP dr Voukswiue würd akzeptiere, hätt si di Iniziative gar nid chönne lanciere.
Syt schlächti Vrlürer.
So viu Vrlürerinnen u Vrlürer wi das Mau sy mr scho lang nümm gsi. Das macht Muet.
