E Milliardär us Herrlibärg – dr Name tuet nüüt zur Sach – e Milliardär us Herrlibärg ergeret sech au Monet grüen u blau, we wider di AHV-Ränte chunnt. Är het sen us Töibi ou scho mau zum Fänschter us gschosse, un es angers mau het er sen abegspüeut. Di Ränte bruuch er eifach nid, seit dä Milliardär, är schwümm im Gäud, we men e Milliarde heig, chömi gäng nöji Millione derzue – wäg de Zinsen u de Dividänden u de Fusionen u de Restrukturierigen u de Uslaagerige vo den Arbeitsplätz. Gäud, we me’s heig, vermehri sech wi am ene heisse Summertag d Flöigen uf eme Schyssdräck.
Di AHV-Ränte, wo si ja itz o no wöui ufetue, seit dä Milliardär wyter, jagin ihm d Stüüren i d Höchi, so dass ihm jedesmau ds Lige weh tüeji, wen er wider e Stüürrächnig überchömm. U ds Schlimmschte syg, was dr Pfarrer Hutzli letscht Sunntig ir Predig gseit heig. Gseit heig er, bim Matthäus stöng, ehnder chöm e Wiudsou dür nes Naduöhr aus e Rychen i ds Rych Gottes.
Dä Milliardär us Herrlibärg het nach dr Predig es haub Dotze Hosechnöpf i d Kollekte gheit u isch de dr Pfarrer Hutzli ga frage, was er chönn mache, für dass ihm di AHV-Ränte nid no ds ewige Läben im Paradies vermassli. Är chönn ja uf di Ränte verzichte oder se diräkt a Brot für aui la überwyse, het dr Pfarrer Hutzli gseit.
Da heige si ne bir EconomieSuisse ganz angersch informiert, seit dr Milliardär. Si heige gseit, Ränteverweigerig syg es Offiziaudelikt, das gäb es Jahr bedingt, u we me vorbestraft syg, we me zum Byspiu mau e Parkbuess gha heig, mües me das Jahr z Witzwyu ga abhocke. Im Widerholigsfau syg läbeslänglechi Verwahrig nid usgschlosse oder – no schlimmer – si nähmi eim dr Füehreruswys.
Dr Pfarrer Hutzli het d Wäut oder besser gseit d EconomieSuisse nümm verstangen u isch aus lösigsorientierte Seeusorger am nächschte Tag mit däm Milliardär zum ene Jurischt vo re Gwärkschaft, won er gkennt het, u dä Jurischt het gseit, en AHV-Ränte mües me nid näh, we me nid wöu, es chönn vilech es Zytli gah, bis d Usglychskasse begriffe heig, dass me se nid wöu, aber jeden AHV-Räntner heig e Rächtsaaspruch uf Ränteverweigerig, das chönn men us em ungschriebne Verfassigsrächt ableite. Dä Jurischt het däm Milliardär de no angers gseit über d AHV u o über di nöji AHV-Initiative.
U itz isch dä Milliardär ganz erliechteret gsi u het de o begriffe, dass es viiu Lüt git ir Schwyz, wo dringend druf aagwise wäre, dass si chli meh Ränten überchiemte, un är, dr Milliardär, het sy AHV-Ränte, rückwirkend uf füf Jahr, däm Komitee la zuecho, wo di nöji AHV-Initiative lanciert het.
U no d Morau vo der Gschicht: Was d EconomieSuisse seit, stimmt nid gäng. Was ii säge, auerdings o nid.
